Salu, Jon!

Salu, Jon!

This is the start of the Mini translation of "Salute, Jonathan!", a book by Mithridates which teaches the Occidental (Interlingue) language by the direct method, using easy vocab and building up in a fun way. This is a work in progress, so please be patient.

Viro i ereki en siti. Viro i note a dia-buku. Viro i mira a siti.

Viro i ereki en siti? Ja, si i ereki en siti.

Viro i ereki en...viro? No, si i no ereki en viro. Si i ereki en siti.

Viro i ereki en rela? No, si i no ereki en rela. Si i ereki en siti. Viro i ereki en siti.

Viro i note a dia-buku? Ja, si i note a dia-buku.

Dia-buku i note a viro? No, dia-buku i no note a viro. Dia-buku i no note. Viro i note. Viro i note a dia-buku.

Siti i mira a viro? No, siti i no mira a viro. Siti i no mira. Viro i mira. Viro i mira a siti? Ja, viro i mira a siti.

Viro i ereki en ve? Si i ereki en siti. Viro i note a ke? Si i note a dia-buku. Viro i mira a ke? Si i mira a siti. Si i ereki en siti, an si i note a dia-buku, an si i mira a siti.

Viro i ereki en dia-buku? No, si i note en dia-buku. Viro i mira a viro? No, si i no mira a viro; si i mira a siti.

Viro e mega. Viro e bon, an viro e inteli. Si i pensa. Si i pensa de siti. Si i pensa: “Siti a ke? Siti e bon? Siti e mega?”

Viro i note a siti? No, si i no note a siti; siti e mega. Si i note a dia-buku; dia-buku e no mega.

Dia-buku i pensa de viro? No, dia-buku i no pensa. Viro i pensa. Si i pensa de dia-buku, an i pensa de siti.

An si i note en dia-buku. Si i note de siti. Si i note: “Siti e bon, an siti e mega.”

Si i pensa: “Siti e bon”; si i pensa ke siti e bon. Si i pensa: “Siti e mega”; si i pensa ke siti e mega. Si i pensa de siti, an si i pensa de dia-buku.

Dia-buku a ke? Dia-buku e ve viro i note; si i note en dia-buku. En dia-buku, viro i note de siti. En dia-buku, viro i no note de rela; viro i ereki en siti, no en rela. Si i no pensa de rela; si i pensa de siti, siti München.

Siti a ke? Si a München. München e ve? Si e ve viro i ereki. Viro e ve? Si e en München.

Ja, München a mega siti, an bon siti. Viro i pensa ke München a bon siti, an si i pensa ke si a mega siti. Viro e inteli. Si i dire: “Salu, München!” Si a bon viro!

Viro i ereki an pensa: “Rela e ve?” Si i mira...si i mira a rela! Si i pensa: "Rela!" Nun si i no pensa de dia-buku an no pensa de siti; si i pensa de rela!

• uno = 1
  • uno-ranko
• duo = 2
  • duo-ranko
• san = 3
  • san-ranko
• Monato 5 de ano 2019 a 2019.05.
  • Uno-ranko dia de monato 5 a 2019.05.01.
  • Duo-ranko dia de monato 5 a 2019.05.02.
  • San-ranko dia de monato 5 a 2019.05.03.

• Viro i pensa de München.
• Viro i note de München.
• Viro i note: "Mi i mira a rela!" Si i note de rela.

• a
• bon: 👍
• de
• dia-buku 📝
• dire
• e
• en
• ereki 🧍
• inteli 🧠
• ja ↔ no
• ke
• mega
• mira 👀
• no ↔ ja
• note 🖋️
• pensa: 💭
• rela 🚂
• salu 👋
• si
• siti 🏙️
• uno = 1
• ve 🗺️ 🤷‍♂️
• viro 👨🏻

Nun viro e en rela. Si e no en München; si e en rela. Si i safari. Si i pensa: "Nun mi i safari de München go Vin. Si a bon safari. Mi i amo a safari."

Si i pensa de München. Si i pensa: “Nun mi e en rela, pero pasa-dia mi i de en München. An nun mi i note a dia-buku en rela, pero pasa-dia mi i de note a dia-buku en München. An nun mi i pensa en rela, pero pasa-dia mi i de pensa en München. Pasa-dia mi i de pensa de München en München, an nun mi i pensa de Vin en rela. Nun mi e en rela, no en Vin. Pero mi i pensa an note de Vin.”

Viro i nun pensa en München? No, si i nun no pensa en München. Si i pensa en rela. Pasa-dia si i de pensa en München. Si i dire: “Salu, rela!”

Viro e en rela, an si i safari go siti. Siti a no München; München a siti de pasa-dia. Siti a Vin; Vin a siti de di-dia.

Viro i pensa de München an Vin. Si i pensa: “München i de a siti de pasa-dia, an München i de e bon. Nun si a di-dia, an mi e en rela; rela e bon. Vin i go e bon?”

Viro i pensa de München: München i de a siti de pasa-dia. Si i pensa en rela: si e en rela di-dia. An si i pensa de Vin: Vin i go veni a siti de sige-dia.

An si i pensa: “München i de e mega. Rela e mega. Vin i go e mega?”

An si i pensa: “En München mi i de note en dia-buku. En rela mi i note en dia-buku. En Vin mi i go note en dia-buku? Ja, sige-dia en Vin mi i go note en dia-buku. Mi i amo a dia-buku.” Viro i pensa mui (si i pensa mui = si i pensa an pensa an pensa), an si i note mui. Ja, si a inteli viro. Inteli viro i note mui, an pensa mui. Si a Jon; Jon a inteli viro.

Si i note: “Mi a Jon. Mi e en rela. Pasa-dia mi i de ereki en München; sige-dia mi i go ereki en Vin.”

Si i pensa, an note: “Rela...si e bon, pero antika. Si e no nu; si e antika. En München rela e antika? Ja, rela de München e antika. Pero rela de München e bon, an mi i amo a rela de München. Pasa-dia mi i de amo a rela en München, an di-dia mi i amo a rela nun, an sige-dia mi i go amo a rela en Vin. Mi i amo a rela!”

Jon i note: "München a bon siti an antika siti, an Vin a bon siti an antika siti. München an Vin e no nu, pero e bon. München an Vin a antika, pero bon siti. Siti e no nu, pero bon. Mi i amo a siti!"

Jon i pensa, ke duo-ranko dia de safari e bon. Si i dire: “Di-dia i de a bon duo-ranko dia de safari. Mi i amo a safari!”

• pasa-dia = uno-ranko dia de monato 5 (05.01)
• di-dia = duo-ranko dia de monato 5 (05.02)
• sige-dia = san-ranko dia de monato 5 (05.03)

• note: di-dia mi i note, pasa-dia mi i de note
• pensa: di-dia mi i pensa, pasa-dia mi i de pensa
• mira: di-dia mi i mira, pasa-dia mi i de mira

• note: di-dia mi i note, sige-dia mi i go note
• pensa: di-dia mi i pensa, sige-dia mi i go pensa
• mira: di-dia mi i mira, sige-dia mi i go mira

• De München go Vin:
  • München → Vin
• De Vin go München:
  • München ← Vin

	1 de monato 5 (pasa-dia)	2 de monato 5 (di-dia)	3 de monato 5 (sige-dia)
note	Jon i de note	Jon i note	Jon i go note
pensa	Jon i de pensa	Jon i pensa	Jon i go pensa
mira	Jon i de mira	Jon i mira	Jon i go mira
a/e	Jon i de a/e	Jon a/e	Jon i go (veni) a/e

• amo
• antika
• di-dia (pasa-dia → di-dia → sige-dia)
• go
• mui
• nu
• nun
• pasa-dia (pasa-dia → di-dia → sige-dia)
• safari
• sige-dia (pasa-dia → di-dia → sige-dia)

Jon i ereki en Vin: siti de Vin. Jon i pensa ke Vin e bon, an ke Vin e bela. Jon i no pensa ke Vin e feo; si i pensa ke Vin e bela. Si i dire: “Vin a bela siti! Mi i go note de si!” An si i note en dia-buku de Vin. En dia-buku si i note: “Mi san-ranko dia e mui bon! En duo-ranko dia mi i de ereki en München. Pero nun mi i ereki en Vin: Vin a no München. München an Vin a duo siti; München a no Vin a Vin a no München. Mi i ereki en Vin an siti e mui bela. Mi i amo a Vin; siti e no feo. Ke Vin e bela! Pero mi i ave a duro.”

Ke? Jon i ave a duro? Ke duro? Nun si i no mira a dia-buku; si i mira a siti an pensa. Si i pensa mui de duro.

Duro de Jon e ke si i amo a Vin, pero si i no ave a tempo.

Si i pensa: “Hmm. Nun si a seven-ranko (7-ranko) ora. En ten-ranko (10-ranko) ora rela i kite. Ten-ranko (10-ranko) ora meno seven-ranko (7-ranko) ora a san (3) ora. San ora a no mui tempo go bela siti! Mi i no ave a tempo. Go-i ave a tempo e bon, pero mi no ave a si! Go-i note a dia-buku e bon, pero mi i no ave a tempo go-i note a si! Ke go-i make en Vin?”

Si i pensa: "Mi i no ave a mui tempo. Ke go-i make - go-i note a dia-buku, u go-i manja, u go-i mira a siti? Mi i go make a ke?"

Si i pensa ma, an dire: “Mi i ave a bon idea! Momen...mi i pensa. Mi rela i kite en ten-ranko (10-ranko) ora. A rela ma tadi, en ten-uno-ranko (11-ranko) ora, u ten-duo-ranko (12-ranko), ten-san-ranko (13-ranko), ten-fo-ranko (14-ranko), u ten-penta-ranko (15-ranko) ora?"

Si i mira...ja! A rela ke kite en ten-penta-ranko ora. Nun Jon e joli.

Jon i dire: “Ten-penta (15) meno seven (7) a ba (8). Nun mi i ave a ba ora de tempo! Mi i go make a ke?”

Si i dire: “Mi i savi! Mi i go manja a filete. An mi i go bibe a bira. Momen...no, mi i go bibe a duo bira, u san bira. Bon idea!”

Nun Jon i bibe a bira en Vin, an manja a filete. Si e joli. Si i dire: “Ke mi e joli! Mi i amo a siti de Vin. Ke mi i amo a safari!”

• Jon i pensa: mi rela i go kite. = Rela de Jon i go kite.
• Jon i note en dia-buku. Si i note a si; si a dia-buku de Jon.

• A viro en rela? Ja, a viro; si a Jon.
• A dia-buku en filete? No, a no dia-buku en filete.

• Si a 10-ranko ora. Ma tadi, si i go veni a 11-ranko ora.
• Jon i de en München. Ma tadi, si i de en Vin.
• Jon i de pensa: "Mi i go manja." Ma tadi, si i de manja.

• Jon i amo a rela. Jon i amo a ke rela? Jon i amo a antika rela.
• Jon i mira a siti. Jon i mira a ke siti? Jon i mira a siti de Vin.

• Jon e en antika rela. Jon i amo a rela. Rela ke Jon i amo e antika.
• Jon i mira a Vin. Vin a siti. Siti ke Jon i mira a Vin.

• Rela e mui, mui antika. Jon i dire: "Ke rela e antika!"
• Filete e mui, mui bon. Jon i dire: "Ke filete e bon!"
• Jon i ave a mega, mui mega duro. Jon i dire: "Ke mi duro e mega!"
• Rela e bela. Ke rela e bela!
• Jon e inteli. Ke si e inteli!

ora

• Si a sita-ranko ora: 6:00
• Si a duo-ranko ora ten: 2:10

ora = 60 minute. uno ora = 60 minute, duo ora = 120 minute. 6:00 a sita-ranko ora an 2:00 a duo-ranko ora. 6:00 meno 2:00 a fo ora.

• Rela i de kite de München. Ma tadi, rela i de en Vin.
• San ora ma tadi, Jon i go kite.

• 1: uno
• 2: duo
• 3: san
• 4: fo
• 5: penta
• 6: sita
• 7: seven
• 8: ba
• 9: nin
• 10: ten
• 11: ten uno
• 12: ten duo...

• a
• ave
• bela
• bibe
• de
• dia = 24 ora
• duro
• feo: no bela
• idea
• joli
• ke
• kite
• ma tadi
• make
• manja
• meno
• mi
• momen: no mui tempo
• mui
• ora
• savi
• tempo

Jon e ve? Si i ereki en Vin? No, si i ereki en ota siti. Si i ereki en Bistritsa. Bistritsa a ke? Si a siti en România. Nun safari en România i begin.

Jon i note en si dia-buku: “Uno-ranko dia de monato penta mi i de en München. Duo-ranko dia de monato penta mi i de en Vin. Den mi i de en Budapest. Budapest i de e bela. Pero mi i no de ave a tempo en Budapest. Mi i de mira a jalan en Budapest. En Budapest mi i de pensa: di vese i fini, an di ese i begin. Budapest e ota.”

Si i pensa mini ma de Budapest. Si i pensa: “Mi a man ke veni de Ingland, de London. Mi i pale a Inglish, ka man en Ingland i pale a Inglish. Pero en Budapest mi i no de pale kon man en Inglish; mi i de pale en Doitsch. Mi Doitsch e no bon, pero man en Budapest i no pale a Inglish. Mi-ale i de pale en Doitsch. Si e interesa ke man en Budapest i pale a Doitsch.”

Nun Jon i pensa de si safari. Si i pensa: “Mi i de en kosa-kasa en London. En kosa-kasa a buku de ota paisa. Mi i de leje a buku. En kosa-kasa a mapa de ota paisa. Mi i de mira a mapa. Buku an mapa i de dire ke ota paisa e fara, pero interesa. En ota paisa a mui man, mui ota man.”

Nun Jon i pensa ma de si safari. Si i pensa: “Pasa-dia mi i de en Kluj-Napoka. Mi i de manja en Kluj-Napoka. Name de manja i de a “paprika hendl”. Si e mui bon, manja en Kluj-Napoka. Otelo i de e bon, pero mi i no de resi bon. Pero paisa e mui bela! En rela mi i de mira a mui vila an mui kasele. Siti e ma mega sama vila, pero vila e mui bela. Kasele e ma mega sama otelo, an ma bela sama otelo! Vila e meno mega sama siti, pero si-ale e bela, an otelo e meno mega sama kasele.”

Jon i note ma en si dia-buku: “Bistritsa a interesa loke. Bistritsa a antika loke, ma antika sama ota loke. An mi otelo en Bistritsa e antika, ma antika sama ota otelo. En otelo mi i de dire a mi name: “Mi a Jon Harker” an si-ale i de dire go mi: “Bon-veni go otelo.” En otelo mi i de mira a koreo go mi. Nun mi i go leje a mi koreo.”

Jon i leje a si koreo. Si i dire:

“Mi amigo. - Bon-veni. I resi bon. Mi e en Bukovina, favo, i veni go Bukovina. Safari de London i de e bon? Mi paisa e mui bela. Bon-veni go mi paisa.

Tu amigo, DRAKULA.”

Jon i leje a koreo an pensa de si amigo Viro-raja Drakula. Si a ke man? Si i no savi. Pero si amigo e interesa. An vila Bistritsa e interesa. Jon e joli, an pensa de si amigo. Den si i resi.

• ma sama: >
  • Jon e ma mega sama dia-buku. = Jon > dia-buku (Jon e mega, dia-buku e no mega)
  • Go-i manja a filete e ma bon sama go-i no manja a filete. = Go-i manja a filete > Go-i no manja a filete (Go-i manja a filete e bon, go-i no manja a filete e no bon)
• meno sama: <
  • Kasa e meno mega sama kasele. = kasa < kasele (Kasele e mega, kasa e no mega)
  • Go-i manja a dia-buku e meno bon sama go-i manja a filete. = go-i manja a dia-buku < go-i manja a filete (Go-i manja a filete e bon; go-i manja a dia-buku e no bon)

• Jon i leje a koreo. Si a koreo de Jon. Si a si koreo.
• Siti i ave a kosa-kasa. Si a kosa-kasa de siti. Si a si kosa-kasa.

• Uno viro a si. Duo, san, fo...viro a si-ale.
• Uno buku a si. Duo, san, fo...buku a si-ale.
• Viro an buku a si-ale.

• Jon i manja a manja. Man i dire: "Tu i manja. Tu manja e bon?" (tu = de Jon)
• Jon i pensa de Drakula. Si i pensa: "Drakula, tu a bon viro. Tu paisa e mui bela."

• Jon i veni de Ingland. Si i no veni de România. România a ota paisa. (= România a no Ingland, si a ota paisa).

• Jon e en rela di-dia, si i de en rela pasa-dia, si i go e en rela sige-dia. România e fara.

• 
  Buku.
• 
  I mira a mapa. En mapa, London a siti en paisa Ingland.
• 
  Koreo.
• 
  Duo amigo.

• amigo
• begin
• bon-veni
• buku:
• di
• Doitsch, Doitschlant
• ese
• fara
• Inglish, Ingland
• jalan
• kasele
• koreo
• kosa-kasa: mega kasa ke ave a antika buku an mapa
• loke
• man
• mapa
• mini: no mui (1, 2, 3 = mini)
• name
• ota: ≠
• otelo
• paisa
• pale: 💬
• resi
• si
• si-ale
• veni
• vese
• vila: no mega siti
• viro-raja: viro ke ave a kasele

Fo-ranko dia de monato penta (= 4-ranko dia de monato 5)

Di-dia Jon i go safari go Viro-raja Drakula. En otelo si i mira a otelo-viro, an mira a koreo de Viro-raja Drakula en mano de otelo-viro. Si i dire go otelo-viro en Doitsch: "Salu, favo, i dona go mi a koreo." Otelo-viro i dona go si a koreo.

Den si i roga en Doitsch: “Koreo a ke? Drakula i de note a ke en koreo?” Pero otelo-viro i dire: “Mi i no pale a Doitsch, mi i no pale a Doitsch.” Jon i pensa: “Raro! Pasa-dia mi i de pale kon otelo-viro en Doitsch, an nun si i dire ke si i no pale a Doitsch! Ke rason?” Si i roga go otelo-viro: “Tu i savi ke Viro-raja Drakula a ke man?” pero nun otelo-viro i no pale.

Jon i pensa: “Raro! Mi i de pale kon otelo-viro en Doitsch. Si i debe pale a Doitsch, pero si i dire ke si i no pale a si! Mi i debe roga go si ma, pero mi i no ave a tempo. Mi i debe kite.”

Nun Jon e en si kamera en otelo. Afa ora si i debe kite. Pero i mira! Antika feme i de veni go si kamera.

Antika feme: “Tu i kite ka de ke rason? Favo, i no kite! Di-dia a no bon dia! Si a mala dia, dia kon mala kosa!”

Jon: “Mi e bon, mi i go mira a amigo. Favo, i no pale de mala kosa.”

Antika feme: “Tu i no savi ke di-dia a dia de Santi-man Jorje? En ten-duo-ranko (12-ranko) ora mala kosa i go veni! Tu i savi a ve tu i go?”

Jon: “No no, antika feme, ale e bon. Mi e bon, an di-dia mala kosa i no go veni.”

Antika feme: “Favo, i no kite! Favo, i no kite!”

Jon: “No, mi i debe kite. Favo, i no lagima.”

Antika feme: “Di a santi-kerusa. Santi-kerusa e go tu.”

Jon: “Ah...Ingland-man i no amo a santi-kerusa...pero danke. Favo, i no lagima.” Jon i pensa: “En Ingland mi-ale i amo a kerusa, pero no santi-kerusa. En România man i amo a santi-kerusa, no kerusa.”

Nun antika feme i go an Jon e solo en si kamera. Si i pensa: “Di loke e raro! Antika feme ke dona a santi-kerusa! Pero mi i debe kite.”

• Jon i de en Ingland an de go a România.
• Jon i de pale go otelo-viro en Doitsch, pero otelo-viro i de dire ke si i no pale a Doitsch.

• kosa:
  • viro, otelo, kerusa, santi-kerusa, Ingland-viro, santi-man...
• a no kosa:
  • pensa, lagima, di, pero, favo...
• Si-ale i ave a uno, duo...: uno viro, duo otelo, uno santi-kerusa, san Ingland-viro, santi-man...si-ale a kosa.
• Si-ale i no ave a uno, duo...: pensa, lagima, di, pero, favo...si-ale a no kosa.

Viro en otelo a otelo-viro. Jon i go a otelo an pale go otelo-viro.

debe + ato-name

• Jon i no ave a tempo; si i debe kite.
• Pero otelo-viro i savi a Doitsch; si i debe pale a Doitsch!

favo, i + ato-name

• Feme i no amo ke Jon i kite. Feme i dire: favo, i no kite!
• Jon i pensa ke otelo-viro i debe pale a Doitsch. Si i dire: favo, i pale a Doitsch!

Di a = i mira, si a

• Di a feme = I mira, si a feme.
• Di a otelo = I mira, si a otelo!

-viro = viro ke veni de paisa.

• Jon i veni de Ingland; si a Ingland-viro.

Go feme: -feme.

Go man (viro, feme, u no savi); -man

• Ale e bon = a no mala kosa (a ten kosa, an ten kosa e bon)
• Ale e mala = a no bon kosa (a ten penta kosa, an ten penta kosa e mala)
• Mi i savi a ale = a no kosa ke mi i no savi

• ale
• danke
• debe
• di a
• dona
• favo
• feme: viro ⟷ feme
• go: go ⟷ veni
• i mira
• Ingland-man
• kamera
• ke rason
• kerusa, santi-kerusa
• kosa
• lagima: 😢
• mala: bon ⟷ mala
• mano
• otelo-viro
• pero
• raro
• roga
• santi-man
• si
• tu

Di-dia Jon i go go a kasele de si amigo Viro-raja Drakula. Safari go kasele i begin nun. Jon i ereki en fore de karo an arapan a karo-viro. “Karo-viro e ve?” si i pensa. “Ah, di a karo-viro – si i pale kon otelo-viro. Si-ale i pale de ke? Mi i no ave a tempo an mi i debe kite.”

Jon i mira en rondo de karo, an mira a mui man. Man i pale mui, pero si i no savi a man. Jon i pensa: “Si-ale e melankoli ka de ke rason? Mi e no melankoli. Mi i pensa ke di a raro loke, pero mi e no melankoli.” Si i mira ke man i pale, an move a mano. Si i mira a si-ale mano...si-ale i make a ke kon si-ale mano? Ah! Nun si i savi. Si-ale i move a si-ale mano sama santi-kerusa. Si-ale mano a no santi-kerusa, pero ven si-ale i move a mano, si-ale mano e sama santi-kerusa.

Karo-viro i veni. Nun safari i begin. Jon i sede en karo. An ota man i sede en karo. Jon i mira a paisa en rondo de si, an pensa ke si e bela. A mui igi. En di paisa a mui poma, an mui lila-rondo-feruta, ka a mui poma-igi an lila-rondo-feruta-igi. Si i dire: "Mmm! Poma-igi e mui bela, an mi i vole manja a si-ale poma." Si i mira an a suga-midori-feruta, ka a mui suga-midori-feruta-igi en di paisa. Si i dire: “Mui bon! Suga-midori-feruta-igi e mui bela, an mi i vole manja a si-ale suga-midori-feruta. Mi i amo a igi de foreta." Pero karo i kipa-make, an kipa-make...si a mui rapi karo! Karo i go rapi ka de ke rason? Si i mira a jalan, ke a no bon jalan; si e antika. Pero karo i go rapi! "Karo i debe go rapi se jalan e antika an a no bon jalan?" si i pensa. Karo-viro i amo go rapi, si i pensa.

Nun karo i go en foreta. Fara si i mira a monte. Monte e mui mega, an an foreta e mui mega. Jon i pensa de monte en Ingland. Si i pensa ke monte en Ingland e mui mini, ma mini sama monte en România.

En rondo de karo Jon i mira, de tempo go tempo, ota man. Si-ale a man de di paisa. Di paisa i ave a ota man sama man en da paisa Ingland. Man en di paisa i viva en foreta, pero man en da paisa, Ingland, i viva en mega siti. An si i pensa de kerusa an santi-kerusa. Ja, man en di paisa, România, i amo a santi-kerusa, pero man en da paisa, Ingland, i amo a kerusa.

Si a ke ora? Si a sita-ranko ora. Ven Jon i de sede en karo si i de a maten. Ma tadi semi-dia i de veni. Semi-dia a 12-ranko ora. Den afa-semi-dia i de veni; afa-semi-dia a tempo afa 12-ranko ora. Pero nun si a eve. Eve a ke? Eve a ora ven sole e no tingi, pero bajo. Nun sole e mui bajo.

Ven Jon i de en karo en semi-dia, si i de e fogo. En semi-dia Jon i de pensa: “Mi e fogo! Mi i debe bibe!” Pero nun, ven si a sita-ranko ora, sole e bajo, an si e no fogo; si e kula. Nun si i pensa: “Mi e kula! Sole e ve?” Jon i no vole e fogo, pero si i no vole an e kula. Si i no de amo e fogo, pero nun si i no amo e kula.

Jon i dire gen: “Sole e ve?” an si i dire: “Safari i go fini en ven? Kasele de mi amigo Viro-raja Drakula e ve?”

Ven Jon e en Ingland, Ingland a di, an România a da.

• Jon en Ingland: "Mi i pensa de paisa. Di paisa a Ingland."
• Jon en Ingland: "Mi i pensa de paisa. Da paisa a România."

Ven Jon e en România, Ingland a da, an România a di.

• Jon en România: "Mi i pensa de paisa. Da paisa a Ingland."
• Jon en România: "Mi i pensa de paisa. Di paisa a România."

Jon e en otelo an pensa ke si otelo e bon, pero si i pensa ke ota otelo e ma bon. Si i pensa: "Di otelo e bon, pero da otelo e ma bon."

-igi a igi de kosa.

• afa-semi-dia
• arapan
• de tempo go tempo
• en fore de
• en rondo de
• eve
• fini ↔ begin
• fogo
• foreta
• gen
• igi
• jalan
• karo
• karo-viro
• kon
• kula
• lila-rondo-feruta
• lila-rondo-feruta-igi
• maten
• melankoli: melankoli ⟷ joli
• move
• poma
• poma-igi
• rapi
• savi
• sede
• semi-dia
• si-ale
• sole
• suga-midori-feruta
• suga-midori-feruta-igi

Karo i go, an go; si i kipa-make go. Jon i mira a mui kosa en eki de karo. Si e en karo, an kosa e no en karo; si i mira a si-ale en eki de karo. Si i mira a kerusa, mui kerusa. Jon i roga go karo-viro: “Mi i kan bajo de karo?” Karo-viro: “No. A mui dogi. Tu i no kan.” Jon: “Ke? A mui dogi?” Karo-viro: “Ja. An an en eki de karo, tu i go mira a mui dogi.” Karo-viro i risa. Jon i pensa: “Si i risa ka de ke rason?”

Nun si a eve; a no sole. Karo i go ma an ma rapi. Man en karo i dire go karo-viro: “I go ma rapi!” Jon i pensa: “Go-i go so rapi ka de ke rason?” Jon i mira a san mega monte en eki de karo. Jon i mira ke man en karo e mui esita; si-ale i pale mui. Man en karo i dire esita: “I go ma rapi!”

Nun karo i para. Si-ale e en pasa inta monte. Jon i savi, ke di si i go mira a karo go-i go a si amigo Viro-raja Drakula pero...si e ve? En fore de Jon a jalan, an solo jalan. Man en karo e joli. Pero Jon e no joli. “Go-i veni go di ve a no karo go-i go a mi amigo Drakula ka de ke rason?”

Karo-viro i pale go man en karo: “Mi-ale i ave e rapi. Mi-ale i ave veni go di kon ora de fore-tempo.” Karo-viro i de pale kon mini voka, pero Jon i de ia a si. Jon i pensa: “Si e bon go-i ave veni go di kon ora de fore-tempo ka de ke rason?”

Nun karo-viro i pale go Jon kon mega voka. Si i dire: “Jon, Herr (Doitsch: Senjore-viro) i no go veni go di di-dia. Si i go go a ota siti, siti Bukovina. Mebi sige-dia Herr i go veni go di. Mebi ja, mebi no. Mi i no savi. Mi-ale i debe kite.”

Jon e melankoli an i pensa: “Senjore-viro Drakula e no di ka de ke rason? Mi i debe kite ka de ke rason?” Pero, di a ke? Kavalo e esita. An man en karo e esita. Jon i mira, an da si i mira an ota karo, ma mega, kon fo kavalo. Nu karo e ma rika, an ma mega sama karo en ke Jon i sede. Fo kavalo e kali, an mui mega. En nu karo Jon i mira a ota karo-viro. Ota karo-viro e mega, an tingi, an i ave a boroda. Boroda an poten mano de karo-viro i make ke Jon i pensa ke si a mui poten viro. Pero Jon i no kan mira a fase de ota karo-viro.

Ota karo-viro i dire: “Tu i ave veni rapi go di, mi amigo.”

Karo-viro: “Ah...Inglish Herr i de vole go rapi...”

Ota karo-viro: “Mi i savi, ke tu i de vole go a Bukovina. Ja, mi i savi a di ke tu i pensa. Mi e ma inteli sama tu. I dona go mi a bagaje de Inglish senjore-viro.”

Karo-viro i dona a bagaje de Jon go ota karo-viro. Ota karo-viro e mui poten; Jon i mira ke si e poten ven si i mira a si mano. Ota karo-viro i toma a bagaje kon si poten mano, an mui rapi kosa e de-i fini.

Nun Jon i sede en ota karo. Di-dia i ave veni a longo dia go Jon. Pero nun ota safari i begin.

Ave + ota ato-name

• Jon e en România. (nun si e en România)
• Jon i de en România. (nun si e no en România)
• Jon i ave en România. (si i de en România, an si e nun en România)

de-i + ato-name

• Safari i esita a Jon. Si e de-i esita.
• Si i de para a karo. Karo e de-i para.
• Si i de kipa-make a safari. Safari e de-i kipa-make.

• ave
• bagaje
• bajo
• boroda
• di
• dogi
• en eki de
• esita
• eve
• fase
• fore-tempo
• inta
• kali
• kavalo (viro-kavalo, feme-kavalo)
• kipa-make
• mebi
• melankoli
• para
• pasa
• poten
• rika
• risa
• ve

Nun Jon i sede en mega karo kon karo-viro. Karo-viro i pale en vunda Doitsch: “Eve e kula, mi Herr (senjore-viro). Da a feruta-sake, bibe de-i make de lila-rondo-feruta. Favo, i bibe a si, se tu i vole bibe.”

Jon i no de bibe. Pero si i de pensa ke si i de e bon, ke si i de ave a feruta-sake go-i bibe. Jon i arapan an pensa de safari.

Karo i go rapi. Den, karo-viro i jira a karo (si i de jira a si uno tempo). An si i jira a karo – duo tempo. Ke? Si i jira a karo...san tempo! Si i jira a si gen, an gen. Jon i pensa: “Mi-ale i no pasa a sama jalan, gen an gen? Ke raro!” Pero Jon i no de roga go karo-viro, ke e mui mega, an mui poten.

Jon i roga go si-ego ke ora a ke. Si i mira a si tempo-uti. Tempo-uti i demo a tempo: si a ten-duo-ranko ora. Ah...ten-duo-ranko ora, si a senta-eve. Jon i savi ke man en România i ave pale go si de senta-eve, de ten-duo-ranko ora, an si-ale i de dire ke ten-duo-ranko ora a mala tempo.

Nun Jon i ia a sono, sono de mui dogi. Sono e mui mega! Ja, dogi i animale-sono. Kavalo i no amo ke dogi i animale-sono. Den Jon i ia a animale-sono de lupo. Animale-sono de lupo e ankora ma mega sama animale-sono de dogi. Kavalo i vere no amo ke lupo i animale-sono.

Karo-viro i dire go kavalo: “I veni e pase-veni.” An kavalo i pase-veni a si-ego. Kavalo e de-i pase-veni, an kipa-make go.

Nun Jon i mira a foreta: si i mira a mui igi, an savi ke si a foreta. An si i ia a vento. Di en foreta, ankora vento i animale-sono. Jon i no amo a animale-sono de vento.

Nun Jon i mira a ota kosa: neve. Si e vere kula! Si-uno i mira a neve solo ven si e kula.

Karo-viro i make a ke? Si i karo a karo. Si i no pale de lupo, si i no pale de monte, si i solo karo a karo. Pero uno tempo Jon i mira a bulu fogo, an karo-viro i para a karo an go mira a si. Ma atadi Jon i mira a fogo, uno tempo, duo tempo, mui tempo. Jon i no savi ke bulu fogo a ke.

Uno tempo karo-viro i para a karo an go fara. Nun Jon e solo kon kavalo. Si i mira a lupo gen. Lupo i no animale-sono; si-ale e silen. Jon i mira a luna, an pensa: “Karo-viro e ve? Si i no veni ka de ke rason?” Kavalo i no amo a silen lupo.

En-i mira a luna, lupo i begin animale-sono. En-i ia a lupo en-i animale-sono, kavalo i begin move. Jon i bata a karo. En-i bata a karo, si i dire: “Tu e ve, karo-viro? Tu i ave go a ve?”

Jon i ia a voka; si a karo-viro. Karo-viro i dire: “Eki, lupo!” An lupo i eki; nun lupo e eki an Jon i no mira a lupo. En-i mira a karo-viro en-i move, si i pensa: “Karo-viro e vere, vere poten.”

Karo i kipa-make. Nun si-uno i no kan mira a luna, ka a nube. Jon i sede en karo en-i kipa-make. Karo i go ma tingi, an ma tingi. En-i mira a nube, an en-i pensa de safari, Jon i nun vole resi.

Nun Jon i save a nulo ma. Si i begin resi, an no savi ke karo-viro i make a ke Jon en-i resi i no mira ke karo i ave veni go kasele de Drakula.

en-i + ato-name

• Jon i note. Mi i mira a Jon en-i note (= Mi i mira a Jon, ke note).
• En-i mira a siti, mi i de pensa ke si i de e mui bela. (= mi i de mira a siti an de pensa ke si i de e mui bela)

• Mi i de note, den mi i de note, den mi i de note. Mi i de note san tempo.
• Si i de bibe a bibe. Den si i de bibe a ota bibe. Si i de bibe duo tempo.

• Jon i roga go viro: "Tu i no pale a Doitsch?"
• Jon i roga go si-ego: "Kasele e ve?" (Jon i roga go si-ego = Jon i roga go Jon)

Si-uno = uno man, mui man, mi, tu, an-ma

• Si-uno i pale a Doitsch en Doitschlant. = Man i pale a Doitsch en Doitschlant.
• Si-uno i no debe bibe en karo. = Tu i no debe bibe en karo, man i no debe bibe en karo.

Ven si-uno i vole ke man i make a kosa:

• i + ato-name

An a/e (a/e -> i veni a/e). I veni e pase-veni! I veni e joli!

• Vere:
  • Jon i mira a fogo an pensa: "Mi i resi?" Pero no, si e vere.
  • Jon i vere no de amo a lupo.
• Solo = uno.
  • Si e solo. (Si i no ave a amigo kon si-ego)
  • Mi i vole solo resi. (Resi a solo kosa ke mi i vole)

• animale-sono
• bata
• bibe
• bulu
• eki
• feruta-sake
• fogo
• i veni a/e
• karo
• luna
• nube
• nulo = 0 kosa
• pasa
• sama: ↔ ota
• senta-eve
• si-ego
• silen
• solo
• tempo
• tempo-uti
• vere
• vunda

Karo i ereki en fore de kasele kon Jon en-i resi. Pero afa momen si i no resi: si e veka. “Ke! Mi e en fore de kasele!” si i pensa. Si i mira a kasele en eve, an si i apara e mui, mui mega. Kasele i apara e interesa; si i interesa a si. Pero si a eve, an Jon e no mui joli; si i pensa de lupo an mala kosa vile de safari. Pero Jon e mini joli, ka si i ave veni go kasele. Si i pensa de manja an bibe, an de go-i resi en bon kama.

En-i pensa a di kosa, si i mira a mun. Ke moda go-i en-go? Karo-viro e eki, Jon e solo, an mun e mega. En-i pensa gen de poten karo-viro, si i mira a mun. Ke go-i make? Mun e silen, an si e mui mega. En-i ereki en fore de mun, Jon i pensa de ke go-i make. Jon i pensa: “Mi i resi?” Pero no, Jon i savi ke si i no resi.

Jon i ereki en fore de mun; si i no ereki en baka de mun. En fore de mun a eve; en baka de mun a kasele. Pero nun Jon i ia a sono en baka de mun: KRRRRR.....CHIKKK.... Mun i open.

En baka de mun, Jon i mira a viro. Si e tingi, antika, an ave a longo bianka labi-boroda. Si a Viro-raja Drakula.

“Bon-veni, Jon! Favo, i en-go!” Drakula i dire. Drakula i toma a mano de Jon. Oh! An Drakula e mui poten, an si mano e kula. Jon i dire go si-ego: “Di mano de Drakula i no apara e viva; si i viva? Si i apara e mori! ...no, i no make a tupe pensa, Jon! Si i viva; si a viro. Si a viva viro.”

Drakula i kipa-make pale: “Mi a Drakula, an bon-veni go mi kasa. Eve e kula, an tu i debe manja, an tu i debe resi. Favo, i dona go mi a tu bagaje.”

Jon: “Mi bagaje? Pero tu a senjore-viro, an en tu kasele a ota man ke...”

Drakula: “No, Tu a mi amigo, an mi man i resi. Favo, i dona go mi a tu bagaje.”

Drakula i begin go kon bagaje; Jon i sige a si. Kasele e vere mega, an en-i sige a Drakula Jon i mira a mui kosa: lada, an ventana, an ota kosa. Nun si-ale i ereki en fore de mega mun. Drakula i open a mun, an si-ale i mira a kamera. En kamera Jon i mira a fogo, an vasa. Jon i vole lava a si-ego kon vasa, ka safari i de e longo.

Drakula i dire: “Favo, i lava a tu-ego kon vasa. An afa go-i ave lava a tu-ego kon vasa, favo, i veni en ota kamera go-i manja.”

Jon i pensa: “Oh, a manja! Mi i debe lava rapi a mi-ego. Mi i vere vole manja.”

Ma tadi, afa go-i ave lava a si-ego, Jon i en-go a ota kamera. Si i mira a manja. Drakula i sede en fore de mega fogo. Si i move a si mano an dire: “Favo, i manja. Mi i ave deja manja.”

Jon i dire: “Ante ke mi i manja, mi i ave a kosa go-i dona go tu. Di a koreo de London. Mi kapo-man i ave note a koreo.”

Drakula i open a koreo, leje a si, an e joli. Si i dona a koreo go Jon an dire: “Tu kapo-man i de dire a bon kosa de tu. Nun an tu i kan leje a koreo.”

Jon i leje a koreo an mira ke ja, si kapo-man en London i ave note a bon kosa de Jon. En koreo kapo-man de Jon i de note ke Jon e inteli, bon viro, an silen. Nun Jon i pensa de ke si e en kasele de Drakula ka de ke rason. Si e en si kasele ka Drakula i de dire ke si i de vole kopen a kasa en London. Drakula i ave a mui mone an vole kopen a kasa, an si i de note a koreo go bisinesa de Jon en-i dire: “Favo, i ade a mi go-i kopen a kasa en London.”

Nun Drakula i demo a manja: si a polo kon keju. Vile Jon i manja, Viro-raja i roga go si de safari. Viro-raja i vole savi a mui kosa de Ingland, de safari, an Jon. Afa go-i ave manja, Viro-raja i dona go si a sigaro, an Jon i toma a si. Pero Drakula i dire ??? si ke si i no fume a sigaro, an Jon i fume a sigaro solo. Jon i mira a Drakula gen an pensa: di viro e mui, mui bianka, an mui poten. Mui bianka, an mui poten viro.

Nun duo viro e silen. Jon i mira en eki de ventana; maten i go sun veni. Pero Jon i kan ankora ia a animale-sono de lupo. Drakula i dire: “I ia a si-ale! Si-ale i make a musika!” Jon i pensa ke Drakula i ave dire a raro kosa.

Drakula i kipa-make: “Ah, tu a siti-viro, tu i veni de siti. Siti-man i no kan savi. Pero bon – tu i ave make a longo safari, an tu i debe resi. Sige-dia mi i ave a mui kosa go-i make. Mi i go mira a tu ma tadi.”

Nun Jon i en-go a si kamera. Si i note en si dia-buku: "Ante duo ora mi i de en karo. Nun mi e en kasele. Afa duo ora mi i go e en-i resi, ka mi i go sun resi." Si i note a ma kosa, an den si i resi.

• Ve?
• Ke man?
• Ke?
• Ven?
• Ke moda?

afa (tempo), ante (tempo)

• Ante dia si i no de savi, pero afa di-dia si i go savi.

afa ke, ante ke

• Mi i de mira a viro. Den si i de dire "salu". Ante ke si i de dire "salu", mi i de mira a si.
• Mi i de dona a mone. Den, mi i de manja. Afa ke mi i de dona a mone, mi i de manja.

afa go-i ave

• Mi i de note a mi dia-buku. Den, mi i de resi. Afa go-i ave note a mi dia-buku, mi i de resi.

vile de + tempo:

• Vile de safari, Jon i de mira a igi.
• Vile de ora si i de pensa de nulo.

vile: ato-name + vile + ato-name

• Si i de note a si dia-buku. Si i de pensa de România. Si i de note a si dia-buku vile si i de pensa de România.

• 
  Jon i de ereki en fore de mun.
• 
  Ventana.
• 
  Viro kon bianka labi-boroda.
• 
  Drakula i ave a mui mone.
• 
  Drakula e mori u viva?

• ade
• apara
• afa
• bianka
• bisinesa
• eki ↔ en
• en baka de
• en-go
• fogo
• fume
• kama
• kapo-man
• keju
• kopen
• labi-boroda
• lada
• lava a si-ego
• ma tadi
• mone
• mori
• mun
• musika
• polo
• sigaro
• sige
• siti-viro, -man, -feme
• sun: nun, afa no mui tempo
• toma
• tupe ↔ inteli
• vasa
• veka ↔ resi
• veni
• ventana
• vile
• viva